Улытозям мон улонэз кырӟай,
Данъяй сое кырӟанъёсын.
Нунал ке кысылӥз, "Лыктод на ай", -
Мон шуылӥ капчи сюлмын.

Ческыт мусур кадь потылӥз омыр.
Мон шокчылӥ гадь тыросам.
Вань котыр улон но кадь адскиз шулдыр,
Ӝужаз, гужлаз йӧнъяськыса.

Мон, бурдъёсты кадь, киосме вӧлъяй,
Бамме ӧй ваты лек тӧллэсь.
Вань кужмыным мон улонэз чупай,
Ӧй шӧды курытсэ солэсь.

Шудэн гинэ ке тырмемын синъёс,
Адӟо вылэм шудэз гинэ.
Сюрес вылын нош куректон гуос.
Кинэ меда витё, кинэ.